O profesor Alberto Cabada Fernández tomou posesión este venres como novo decano da Facultade de Matemáticas da Universidade de Santiago de Compostela (USC), un posto que asume “coa ilusión de seguir facendo crecer a Facultade, con responsabilidade, pero tamén con alegría e confianza no futuro”.
“A Facultade de Matemáticas é moito máis que unha unidade docente e investigadora: é unha comunidade cohesionada, construída sobre o rigor, o esforzo colectivo e a vocación académica”, así definiu Cabada a facultade que dirixirá o próximos seis anos, tomando a substitución de Elena Vázquez Cendón.
No acto de toma de posesión que tivo lugar este venres, o novo decano referiuse ao caso específico do Máster en Matemáticas, sobre o que asegurou que a súa desaparición “provocará, máis pronto que tarde, un descenso na matrícula de alumnado altamente motivado e cualificado, o cal repercutirá negativamente en todas titulacións impartidas no centro e no propio dinamismo investigador”.
Ademais, segundo indicou a USC nunha nota de prensa, o novo decano tamén aproveitou para referirse como unha dos “sinais de identidade máis claras” da Facultade á “aposta decidida” polos dobres graos.
Na súa opinión, “na inmensa maioría dos casos”, tanto o grao en Matemáticas como os dobres graos asociados á Facultade “son a primeira opción escollida polos estudantes que os cursan, o que demostra a gran confianza e o alto crédito que a sociedade en xeral, e a galega en particular, deposita en nós”.
