A Universidade de Santiago de Compostela (USC) celebrará “nas próximas semanas” un Consello de Goberno extraordinario para avaliar o “impacto institucional” das actuacións da Secretaría Xeral de Universidades da Xunta.
Un Consello que vén convocado por iniciativa directa do propio órgano universitario, despois de que máis da metade do censo — incluíndo representantes do profesorado, do PTXAS, e do estudiantado–, asinasen unha solicitude impulsada pola Plataforma en Defensa do Máster en Matemáticas e o Consello do Estudiantado.
“Un feito insólito e sen precedentes, tanto pola excepcionalidade do procedemento como polo motivo que o xustifica e, de acordarse un posicionamento institucional, o Reitor deberá trasladalo formalmente ao conselleiro de Educación, Román Rodríguez, tal e como recolle a proposta”, detallou a USC nunha nota de prensa.
A solicitude, rexistrada formalmente á Secretaría Xeral da USC este luns, establece como obxectivo central da sesión “a análise e valoración das decisións adoptadas pola SXU e do seu impacto no funcionamento da universidade”.
Entre os motivos indicados está a “aplicación arbitraria” do Decreto 222/2011, “que está a provocar a desaparición de titulacións públicas sen criterio académico”. Así como a “inxustificada negativa á declaración de singularidade do Máster en Matemáticas da USC”.
A continuación, denunciou “a ignorancia deliberada da normativa cando favorece á universidade privada, autorizando titulacións duplicadas que xa están consolidadas no sistema público”. Así como a “intervención” na organización interna das universidades, como no caso do Campus de Lugo, “cuestionando titulacións específicas e promovendo sistemas e modelos lingüísticos alleos ás competencias propias da Secretaría Xeral”.
Pero tamén se referiu ao deseño de convocatorias que “penalizan o acceso” á carreira investigadora, con prazos, condicións e recortes salariais que “expulsan talento e exclúen persoas” por ter experiencia fóra de Galicia.
“A situación resulta especialmente grave non só polos feitos concretos, senón pola deterioración crecente da confianza entre a comunidade universitaria e a Secretaría Xeral de Universidades, encabezada por José Alberto Díez de Castro, cada vez máis illado institucionalmente“, subliñou.
Neste sentido, lembrou que “mesmo o grupo municipal do PP en Santiago tamén asinou unha declaración institucional, aprobada por unanimidade no Pleno do Concello, na que se solicita manter o máster e recoñecer a súa singularidade”.
Ademais, lamentou que, a pesar de que o conselleiro Román Rodríguez ofreceu en sede parlamentaria manter unha reunión cos representantes do máster, “esa reunión a día de hoxe aínda non se produciu”.
“A USC vive así un momento extraordinario, no que se abre a posibilidade real de que a universidade se pronuncie colectivamente fronte a unha deriva da xestión autonómica que ameaza o equilibrio do sistema público universitario galego”, concluíu.
