O decano da Facultade de Matemáticas da Universidade de Santiago de Compostela (USC), Alberto Cabada, solicitou unha “reunión urxente” co conselleiro de Educación, Ciencia, Universidades e FP, Román Rodríguez, para reverter a desaparición do Máter en Matemáticas do catálogo para o próximo curso.
En concreto, Cabada rexistrou este mércores a solicitude de reunión co conselleiro despois de aprobarse o martes nunha reunión da xunta da facultade. Ademais, esta iniciativa recolle a petición do propio Rodríguez, despois de que este afirmase no anterior pleno do Parlamento galego, hai dúas semanas, que estaba “a disposición” de sentar para “dar unha saída dialogada” ao problema desta titulación.
E é que o Máster en Matemáticas da USC, o único desta disciplina orientado cara á investigación de toda Galicia, non se impartirá o próximo curso por falta de alumnos durante varios anos consecutivos.
Con todo, isto poderíase evitar se a Xunta non desestimase a declaración deste título como ‘singular’, que permitiría a súa continuidade con independencia do número de matrículas. Precisamente, esta mesma semana o reitor da USC, Antonio López, avanzaba que recorrería esta decisión.
A Plataforma en Defensa do Mestrado en Matemáticas destaca nun comunicado que esta causa conta “cun apoio sen precedentes” de diversas institucións, entre elas o Colexio de Decanos da USC, a Conferencia de Decanos de Matemáticas de España, o Centro de Investigación e Tecnoloxía Matemática de Galicia (Citmaga) e o presidente da Axencia para a Calidade do Sistema Universitario de Galicia (Acsug), o recoñecido matemático Juan José Nieto Roig.
A isto suman case 5.000 firmas cidadás e o “apoio explícito” de diversas figuras deste campo, posto que o máster está ligado a liñas de investigación de “recoñecido prestixio” e conta cunha produción científica “de alto nivel” e unha “elevada captación de financiamento”, tanto nacional como europea.
Neste contexto, a plataforma alerta de que a súa desaparición “suporía unha fuga de talento e un golpe á continuidade da investigación en matemáticas en Galicia”.
