O sindicato USO denunciou este mércores que os traballadores e usuarios da residencia DomusVi Fundación José Otero-Carmela Martínez de Santiago levan “varios días” soportando temperaturas superiores aos 30 graos, “sen contar cun sistema de ventilación ou aire acondicionado adecuados”.
Nun comunicado, o sindicato lembrou que a normativa de prevención de riscos laborais recomenda temperaturas de entre 23 e 26 graos, ata un máximo de 27 graos, para traballos sedentarios.
Nesta residencia de maiores, explicaron, os termómetros superaron varios días eses 27 graos e, nas últimas xornadas, chegaron a soportar temperaturas de máis de 32 graos.
O USO subliñou que, debido ao cambio climático, o 71 % dos traballadores están expostos á calor como risco laboral, e sen protocolos preventivos adecuados. Respecto diso, advertiron de que esa calor extrema en traballos ao aire libre ou en contornas con climatización insuficiente non é un risco “natural” senón “laboral” e require medidas “urxentes”.
Por iso, reclamaron ao grupo DomusVi que instale nese centro de Santiago “canto antes” un sistema de climatización, unha obra que as traballadoras e usuarios “levan anos esperando”.
XUNTA: PREPARAN PROXECTO PARA RENOVAR A CLIMATIZACIÓN
A Xunta de Galicia confirmou que traballa na redacción do proxecto para a renovación do sistema de climatización do centro DomusVi de Santiago, cuxas temperaturas superan os 30 graos segundo denunciou o sindicato USO.
Unha vez aprobado, explican fontes da Consellería de Política Social e Igualdade, suporá a instalación dun novo equipo específico e adaptado para regular a temperatura da residencia.
Mentres, explican que a Administración autonómica dotará a este centro de diferentes equipos electrónicos para a adaptación da temperatura a través do movemento e a refrixeración do aire en cada unha das estancias. Instalaranse ao longo do complexo, nas salas comúns e tamén nos compartimentos destinados ao descanso do persoal e os usuarios.
Así mesmo, facilitaranse aparellos para o control da humidade e poder regular tamén as temperaturas das instalacións, especialmente nas zonas comúns, “que contribúan a mellorar a calidade do aire nos momentos de maior temperatura”.
