O reitor da Universidade de Santiago de Compostela, Antonio López, reafirmou esta fin de semana a súa posición contraria á creación dunha nova Facultade de Medicina na Coruña, defendendo que Galicia debe contar cunha única titulación pública en Medicina. Fíxoo nunha entrevista na Cadea Ser na que apelou á racionalidade do modelo actual e á súa vontade de aproveitamento coordinado dos recursos dispoñibles no sistema universitario e sanitario galego.
“Teño claro que o modelo polo que temos que loitar e traballar todos é o dunha única Facultade de Medicina”, indicou, subliñando que o obxectivo debe ser “dar xogo a todos os profesionais” sen caer en duplicidades que, ao seu ver, non son sustentables. A súa proposta pasa por manter os tres primeiros cursos en Santiago e avanzar, desde cuarto, cara a unha descentralización da docencia teórica e clínica noutras cidades, un esquema que considera semellante ao do modelo vasco, que puxo como exemplo a seguir.
Neste sentido, López remarcou que esta descentralización só sería posible se os hospitais que acollan as unidades docentes contan con profesorado asignado, e insistiu en que a USC debe manter a responsabilidade exclusiva da titulación, así como das facultades e departamentos implicados. Abriu, iso si, a porta a que poidan participar docentes doutras universidades galegas, como Vigo ou A Coruña, sempre baixo condición de profesorado externo e cun límite razoable de implicación.
O reitor tamén trasladou que tanto el como o seu homólogo da Universidade de Vigo quedaron “sorprendidos” pola iniciativa da Universidade da Coruña de propoñer a creación dunha nova facultade. Na súa opinión, existe un consenso maioritario sobre a conveniencia de evitar a multiplicación de facultades públicas de Medicina en Galicia, e aposta por unha solución compartida que permita reforzar a formación sen recorrer á creación de novos centros.
Finalmente, cuestionado sobre a súa posible candidatura á alcaldía de Santiago polo PSOE, López foi rotundo ao descartar completamente esa opción, asegurando que “se llo pedisen, diría que non”. Con estas palabras, pecha especulacións sobre un posible salto á política municipal tras a súa etapa á fronte da universidade compostelá.
