A portavoz municipal do Concello de Santiago, Míriam Louzao, instou á Xunta de Galicia a “manter a coordinación” dos tres aeroportos galegos, situados na Coruña, Vigo e Santiago de Compostela, para “ter unha oferta que cumpra coas perspectivas lóxicas que ten que ter unha política aeroportuaria de país“, para o que ofreceu a colaboración do goberno local.

Preguntada este luns en relación ás queixas de hostaleiros por atrasos e cancelacións de voos durante as Festas da Ascensión, celebradas a finais de maio, a edila asegurou que o consistorio mantén o “traballo habitual” e “intenso” de “manter o contacto” coas compañías aéreas para “chegar a determinados acordos para que haxa esas conexións”. Desta forma, espera poder anunciar “novidades” nas próximas semanas, indicou durante a rolda de prensa posterior á xunta de goberno local.

Con todo, incidiu en que a xestión aeroportuaria “transcende ao Concello”: “Como dicimos sempre, as cuestións aeroportuarias non son só teñen que ver co turismo; senón tamén con outras cuestións profesionais, económicas e demais, que non soamente teñen que ver co Concello de Santiago”. Nesta liña, insistiu en que o Goberno galego debe “manter” a “coordinación” entre os aeroportos galegos para adecuar a oferta ás “perspectivas lóxicas” ás que se “ten” que adecuar a política aeroportuaria de Galicia.

NOMEAMENTO DE AITOR BOUZA

Por outra banda, Louzao trasladou as súas “felicitacións” a Aitor Bouza pola súa reelección como secretario xeral do PSOE de Santiago. “O que esperamos é que o diálogo e o interese da poboación sexa o que prime nas decisións que tomará como secretario xeral”, esgrimiu. Preguntada en relación a se houbo conversacións con el e pola relación do goberno local co PSOE, a concelleira precisou que, no seu caso, non tivo “a ocasión de falar con el” e reiterou a posición do Concello nestes casos: “Non opinamos normalmente das cuestións internas das organizacións políticas”.