O Concello de Santiago anunciou a simplificación do proceso administrativo para a celebración de ‘cacharelas’ acompañadas de romarías, festas ou concertos durante o mes de xuño, con motivo de San Xoán. A nova normativa, que se aprobará na xunta de goberno local o vindeiro luns, reducirá os requisitos para a maioría das solicitudes, agás nos casos que impliquen instalacións de gran tamaño ou atraccións accesibles ao público.
En concreto, só se esixirá documentación técnica adicional cando se instalen escenarios ou tarimas de máis de 60 metros cadrados ou máis de 0,50 metros de altura, así como no caso de atraccións de feira. Para o resto de celebracións, bastará cun plano de situación, unha memoria da actividade e un seguro de responsabilidade civil. As solicitudes deberán presentarse na sede electrónica do Concello entre o 2 e o 19 de xuño, e priorizaranse aquelas realizadas por asociacións veciñais ou culturais con sede en Santiago.
No caso das celebracións en espazo público, será necesaria unha autorización mediante declaración responsable. Pola contra, para eventos en espazos privados só se esixirá unha comunicación previa. Como é habitual, estará prohibida a celebración destes eventos en prazas emblemáticas como a do Obradoiro, Quintana, Toural ou Praterías, entre outras.
Establécense tamén normas de seguridade específicas: as ‘cacharelas’ non poderán superar certas dimensións segundo se celebren en zona urbana ou rural, e deberán colocarse afastadas de vivendas, vehículos ou elementos sensibles. Queda prohibido queimar materiais contaminantes, e no caso de realizalas sobre lousados, será obrigatorio usar unha capa de area de 10 centímetros, que poderá solicitarse ao Concello por correo electrónico.
