A Plataforma Compostela por Palestina, en colaboración co Concello de Santiago, inaugurou este venres a exposición ‘Unha ollada sobre Palestina’ no Centro Sociocultural (CSC) de Conxo. A mostra reúne 22 fotografías cedidas polo autor Hosny Salah, un xornalista e fotógrafo palestino que documentou o conflito desde o seu inicio para reflectir “como se estaba vivindo a situación” e, así, “concienciar á cidadanía”, segundo explicou un representante da organización cidadá tras a exposición, Miguel Fernández.
As fotografías van acompañadas de códigos QR que permiten acceder a información concreta sobre cada unha das imaxes. Neste sentido, Fernández reivindicou: “Non nos podemos quedar parados mentres asistimos ao intento de destrución total dun pobo e dun territorio, en algo que xa vai máis aló dun xenocidio”. A exposición ten un carácter itinerante e, antes de chegar ao barrio de Conxo, púidose ver no CSC de Vite, o CIFP de Compostela e o IES Terra do Xallas, en Santa Comba.
COLABORACIÓN E APOIO DO CONCELLO
Así mesmo, a alcaldesa de Santiago, Goretti Sanmartín, trasladou a solidariedade coa causa da mostra: “Apoiamos todas aquelas iniciativas que teñan como obxectivo visibilizar a situación terrible que está a vivir o pobo palestino”. Para a rexedora, “o xenocidio que se está producindo dá conta de que algo pasa na humanidade cando se están asasinando a miles de persoas, miles de nenos e nenas” e, ademais, está a mostrar “imaxes que producen calafríos”. “Hai determinadas organizacións políticas que miran cara a outro lado”, reprochou.
Pola súa banda, a tenente de alcalde e concelleira de Dereitos e Servizos Sociais, María Rozas agradeceu á plataforma “todo o traballo que fai polo pobo palestino” e “visibilizar” en Santiago “a situación deste xenocidio que está a vivir Gaza”. Segundo lembrou, esta mostra fotográfica forma parte dun acordo ausmido no pleno municipal e apoiado por BNG, Compostela Aberta e PSOE, que inclúe outras iniciativas que se irán desenvolvendo ao longo destes meses.
