A Universidade de Santiago de Compostela (USC) e a Confederación de Empresarios de Galicia (CEG) formalizaron este martes un acordo de colaboración que permitirá ás empresas asociadas beneficiarse de condicións favorables nas medicións de gas radón nos seus postos de traballo. O convenio foi asinado polo reitor da USC, Antonio López, e o presidente da CEG, Juan Manuel Vieites, co obxectivo de reforzar a prevención de riscos laborais en espazos susceptibles de acumulación deste gas.
As medicións realizaranse a través do Laboratorio de Radón de Galicia, creado en 2005 e adscrito ao Centro de Investigación Interdisciplinar de Tecnoloxías Ambientais (CRETUS), baixo a coordinación do catedrático Alberto Ruano. Esta infraestrutura científica, con sede na USC, é actualmente unha das máis avanzadas na análise da presenza de radón en Galicia e conta cun rexistro de máis de 6.000 medicións en vivendas, accesibles a través do Mapa de Radón de Galicia.
O acordo conxunto senta as bases para que o laboratorio realice medicións de radón en lugares de traballo situados en municipios considerados de actuación prioritaria segundo o Código Técnico de Edificación, especialmente en sotos e plantas baixas. Nestes casos, a normativa obriga a avaliar a concentración de radón e a aplicar medidas correctoras cando se superen os 300 Bq/m³, valor límite establecido no regulamento de protección fronte a radiacións ionizantes.
A USC e a CEG crearán unha comisión de seguimento que se encargará da vixilancia e control da execución do convenio. O Laboratorio de Radón de Galicia, acreditado como Laboratorio de Ensaio polo Instituto Galego de Vivenda e Solo (RELAGA), xa traballa habitualmente en coordinación con servizos de prevención de riscos laborais e mutuas, tendo realizado milleiros de medicións en empresas galegas nos últimos anos.
