Santiago regresou un ano máis a 1856 cunha nova edición da festa do Banquete de Conxo, unha cita que reúne por centos de composteláns na histórica ‘carballeira’ para lembrar a aqueles universitarios, obreiros e artesáns que, hai case 170 anos, compartiron mesa para reivindicar a igualdade e a liberdade.

Aínda que os actos de celebración empezaron xa o venres, este domingo foi o gran día da festa do Banquete, unha xornada na que o ambiente festivo foi o protagonista e que comezou cun desfile desde a praza do Toural ata o campo da festa de Conxo. Entre sons de gaitas, tambores, berros de alegría e un ambiente de xúbilo, centos de veciños percorreron as rúas vestidos con traxes de época ata chegar á praza Aurelio Aguirre de Conxo, onde tivo lugar o pregón, a cargo de Xosé Neira, representante da parroquia de Aríns, e Manuel Cespón, representante da parroquia de Figueiras.

Este último destacou a cita como “unha homenaxe a aqueles estudantes e obreiros que se reuniron, unha xornada para non esquecer de onde vimos e onde queremos chegar. Se unha sociedade esquece a súa historia pode estar condenada”. Un mercadillo con libros, artesanía e mostras de oficios, así como propostas musicais, foron a antesala dunha comida e romaría que non quixeron perderse representantes políticos como a alcaldesa de Santiago, Goretti Sanmartín, a portavoz nacional do BNG, Ana Pontón, e membros da Corporación municipal.

Unha xornada festiva na que mesmo a choiva deu tregua –aínda que unhas tímidas pingas non quixeron perderse o pregón– e na que a polémica, protagonista durante esta semana pola senda que afectaba o Bosque de Conxo, e as disputas políticas deixáronse ao carón. Cabe lembrar que esta mesma semana a Xunta anunciou a suspensión do tramo da senda que afectaba o Bosque de Conxo e que destinará os fondos a outra actuación de mobilidade “sustentable” noutro municipio.

Pola súa banda, a alcaldesa de Santiago, Goretti Sanmartín, reprochou ao líder do PP local, Borja Verea, “non ter en conta os criterios técnicos e os informes” emitidos pola Xunta de Galicia sobre a senda de Conxo, ante o seu anuncio de retomar o proxecto “na súa integridade” no caso de que el chegase a gobernar a cidade en 2027.