A Consellería de Vivenda e Planificación de Infraestruturas, a través do Instituto Galego de Vivenda e Solo (IGVS), iniciou este mércores o procedemento para a adxudicación de tres vivendas de promoción pública (VPP) en aluguer accesible para menores de 36 anos, situados en Belvís, en Santiago de Compostela.
O sorteo público terá lugar o próximo 16 de maio, de forma que este tres pisos súmanse aos outros 60 que a Xunta xa anunciara, o que fará un total de 63.
Segundo trasladou o Goberno galego, poderán participar nel entre os demandantes inscritos no Rexistro de Demandantes de Vivenda de Galicia, para o concello de Santiago como municipio preferente, e que presenten uns ingresos por unidade familiar entre 1 e 3,5 veces o IPREM. Os contratos de aluguer terán unha vixencia inicial de 7 anos, e poderán ser prorrogados.
Unha vez realizado o sorteo, a lista provisional de adxudicatarios publicaranse nos taboleiros de anuncios do Concello e do IGVS así como na páxina web deste organismo. Así mesmo, a continuación abrirase un prazo de 10 días para a presentación de posibles reclamacións.
63 VIVENDAS A SORTEO O 16 DE MAIO
Ademais destes 3 fogares en Belvís, o 16 de maio tamén serán sorteadas ante notario as vivendas do inmoble de promoción pública de nova construción situado na rúa Castiñeiriño 81, con 24 vivendas, das que 9 serán destinadas a aluguer a menores de 36 anos.
Así mesmo, adxudicaranse as do novo edificio na rúa Virxe Branca s/n (Lamas de Abade) de 24 fogares, dos que 9 serán destinados a aluguer a menores de 36 anos. Por último, tamén serán sorteadas 12 vivendas no edificio na rúa Constantino Limia Nogueira s/n (Lamas de Abade), das que 5 serán destinadas a aluguer a menores de 36 anos.
