A realización de obras no Pazo de Raxoi, sede do Concello de Santiago, obrigará a trasladar determinadas dependencias e servizos municipais, polo menos de forma temporal. Por exemplo, o persoal de Urbanismo moverase ao edificio denominado Casa Jimena e Elisa Fernández de la Vega, en Casas Reais, unha vez que se instalen os mobles e equipos necesarios.
Ademais, haberá cambios a outros edificios e mesmo dentro do propio Pazo municipal, no que servizos municipais comparten, por exemplo, espazo co Consello da Cultura Galega.
Parte do edificio, vía cesión do poder municipal, confórmano dependencias das que fai uso a Xunta e que son, por exemplo, escenario habitual de actos institucionais relevantes –un dos últimos a firma do traspaso da xestión do litoral entre o presidente da Xunta, Alfonso Rueda, e o ministro de Política Territorial, Ángel Víctor Torres–.
Nesta conxuntura, en Raxoi, o persoal do Arquivo Municipal trasladarase ao despacho con acceso desde as escaleiras entre o primeiro e o segundo piso. Os locais sindicais da terceira planta moveranse ao estadio municipal de San Lázaro, sen prexuízo de que se poida pór á súa disposición unha sala de reunións nun espazo máis próximo á sede do Consistorio.
En canto ao persoal da Asesoría Xurídica, situarase temporalmente na antesala da Alcaldía e noutras dependencias dispoñibles na primeira planta.
SECRETARÍA
Sen saír de Raxoi, o persoal da Secretaría trasladarase a dependencias que, precisamente no seu día, foron cedidas á Xunta e das que fai uso a Dirección Xeral de Relacións Institucionais e co Parlamento dá Xunta de Galicia.
Se fose necesario, habilitaríase tamén unha zona do edificio da Rúa do Vilar que é sede do Consorcio da cidade.
