A alcaldesa de Santiago, Goretti Sanmartín, trasladou que espera que a peza necesaria para arranxar a avaría do ascensor de Triacastela, que conecta a Rúa dos Concheiros e a Avenida de Lugo, chegue esta semana e que para a próxima estea arranxado.
Preguntada polos medios de comunicación en rolda de prensa, Sanmartín explicou que hai un problema co cableado do ascensor e que “non é a primeira vez que se estraga”, polo que se “está facendo unha análise para que non se estrague con esa continuidade”.
Nesta liña, a mandataria local ampliou que a empresa non tiña unha peza necesaria para facer o arranxo, motivo polo que a actuación se demorou unhas semanas.
Así mesmo, Sanmartín desculpouse polas molestias causadas pola avaría do ascensor e asegurou que “hai que facer un arranxo a longo prazo para evitar a deterioración dos cables”.
