A concelleira de Educación, Miriam Louzao, presentou o aumento de prazas de conciliación familiar en educación, das cales se destinará un 3% aos nenos con necesidades especiais.
Unha novidade que, segundo a concelleira, inclúen “para garantir o dereito a todos os nenos a participar en todas as actividades sexa cal for a súa necesidade”. Para iso, incorporarase persoal dotado para garantir a súa inclusión no programa.
Segundo trasladou, haberá 90 prazas para o período de Nadal, Entroido, Semana Santa e agosto e 195 para os meses de xuño, xullo e setembro, a etapa de maior demanda.
Neste sentido, licitaranse dous lotes, un destinado á contratación de monitores e as actividades lúdicas e o segundo para o servizo de catering (almorzo e comida), desenvolvidos por empresas diferentes.
Ademais, contará cun novo sistema informático, mediante unha aplicación e a páxina web a través dun rexistro de usuario que terá cada familia. As solicitudes realizaranse por un formulario para axilizar o proceso. Desta maneira, poderán contratar servizos, activar un determinado período, escoller o tipo de praza e enviar suxestións.
O prazo de presentación de solicitudes para nenos e nenas con matrícula no curso actual estará aberto ata o nove de abril. A continuación, publicaranse o 14 de abril as vacantes e abriranse as solicitudes para nenos de novo ingreso do 21 ao 28 de abril. A listaxe de admisión publicarase o 28 de maio. Os prezos, engadiu, irán en función da renda das familias, aínda que Louzao non prevee grandes modificacións.
