A Policía Nacional detivo a un home por tentar roubar nunha tenda da rúa García Prieto, no barrio compostelán de Conxo, e agredir a unha dependenta, á que fracturou dúas costelas.
En declaracións aos medios este xoves, o concelleiro de Convivencia, Xan Duro, mostrou a súa “máxima solidariedade” coa muller afectada ante un feito “totalmente despreciable”.
Así, afirmou que a persoa está detida e que a presenza policial está a incrementarse, tanto por parte da Policía Nacional como Local, “dentro dos limitados efectivos que existen” e, engadiu, seguirase “reforzando esa vixilancia”.
En todo caso, Xan Duro insistiu na importancia de que a cidadanía “chame e denuncie”. “Se deixamos pasar as cousas non hai forma de ter o panorama real da cidade. Se hai un problema, que chamen á Policía Local ou Nacional e atenderáselles, e así poderemos intervir con máis presteza”, manifestou.
