O concelleiro de Sustentabilidade Ambiental, Xesús Manuel Domínguez, presentou este mércores os avances do proxecto de reforma dos espazos verdes da capital, ‘Entre Sar e Sarela’, e trasladou que “en principio” estará acabado este 2025, como dita a Unión Europea, que financia o 95 por cento, case 3,9 millóns de euros.
Deste xeito, Domínguez afirmou en rolda de prensa que “todos os proxectos están en marcha”; o barrio de Cornes, o Xardín Botánico e o monte do Viso atópanse en fase de redacción e execución en licitación, mentres que a iniciativa da lagoa do Auditorio de Galicia está en redacción e a obra de Pontepedriña en fase de adxudicación.
O corazón desta iniciativa son ese cinco obras diferentes e, segundo afirmou o edil, a súa realización “incrementará a estrutura verde, a conectividade entre os espazos verdes e azuis, e adaptará Santiago ao cambio climático”. Ademais, puntualizou que é unha “oportunidade crucial para camiñar cara ao modelo de cidade que impulsa o concello”.
PONTEPEDRIÑA PROTAGONISTA DO PROXECTO
O barrio verde de Pontepedriña será o punto máis importante do cinco centrais do proxecto, xa que consumirá 2.133.810 euros, máis do 50 por cento do orzamento total. Nel levará a cabo unha renaturalización da zona (cales Amor Ruibal e Escultor Camilo Otero, praza Pintor Laxeiro, parque Eugenio Granell e IES Pontepedriña) e construirase un corredor ecolóxico urbano. O seu prazo de execución é de sete meses.
Tamén contará cun proxecto piloto para a xestión da auga da choiva, para o que o Executivo municipal xa conta co apoio da Xunta.
REFORMA DA LAGOA DO AUDITORIO
Doutra banda, a reforma da lagoa artificial do Auditorio de Galicia será a segunda obra máis cara, con 963.255 euros de orzamento. O seu prazo de execución é de cinco meses e nela realizarase unha naturalización da lagoa e unha restauración da súa contorna, no que se atopa o río Corgo, parcialmente canalizado.
O resto das actuacións seguen a liña en canto ao tempo de execución: o xardín Botánico oito meses, e o barrio de Cornes e o monte do Viso seis meses.
COMBATER O CAMBIO CLIMÁTICO
Na rolda de prensa estivo tamén presente o biólogo e investigador do Instituto de Biodiversidade Agraria e Desenvolvemento Rural (Ibader) Pablo Ramiro.
Leste explicou que o proxecto ‘Entre Sar e Sarela’, aprobado a nivel europeo, estatal, autonómico e agora municipal, conta con actuacións que combaten os aspectos negativos do cambio climático.
