O líder do PP de Santiago, Borja Verea, esixiu prazos para a implantación da chamada taxa turística e denunciou a “ausencia de información” do goberno local sobre o momento no que estará operativa.
“Se a encargada da taxa fose a Xunta, teriamos ao BNG o 2 de xaneiro pedindo explicacións de por que non está implantada aínda, pero como a responsabilidade é deles non son quen nin de expor un cronograma”, sinalou.
Deste xeito, Verea lamentou que o goberno local “non fixese os deberes” e fixo fincapé en que o borrador de ordenanza “tiña que estar traballado porque desde o verán xa se sabía que ía haber esa habilitación legal a 1 de xaneiro” e, por tanto, “tiñan que estar eses borradores en formato de anteproxecto para poder traballar sobre eles”.
Ademais, o líder popular insistiu en que debería ser o propio Concello quen xestione esta taxa “que non deixa de ser na práctica un imposto municipal”. Con todo, o PP de Compostela esixiu aos nacionalistas nunha nota de prensa “que se poñan a traballar xa e deixen de marear a perdiz coa taxa, xa que teñen todas as ferramentas legais para pola en marcha”.
