O Consello de Goberno da Universidade de Santiago de Compostela aprobou este xoves a remisión ao Claustro Universitario da proposta de novos Estatutos adaptados á Lei Orgánica do Sistema Universitario. A documentación deberá agora ser debatida neste órgano antes da súa aprobación definitiva.
Segundo informou a institución, o texto integra máis de 800 achegas realizadas tanto pola comunidade universitaria nun período previo de consulta pública, como polos membros do Consello de Goberno na súa última revisión. A proposta mantén abertas cuestións clave para o debate no Claustro, como o modelo organizativo da universidade, a posible existencia ou non de Departamentos, así como o nivel de participación dos distintos sectores da comunidade universitaria nos órganos de goberno.
Ademais, nunha sesión extraordinaria, o Consello de Goberno aprobou a ampliación do prazo de devolución da débeda bancaria da USC. A medida implica a renegociación dos prazos de tres créditos bancarios para garantir o inicio das obras da Fase 1 da nova sede da Facultade de Farmacia, que terá un custo total de 24,57 millóns de euros e un prazo de execución de 2025 a 2028.
A reestruturación da débeda permitirá que os fondos inicialmente destinados á amortización en 2025 e 2026, que ascenden a 7,59 millóns de euros, sexan utilizados para cubrir as necesidades económicas da nova infraestrutura. A decisión conta coa correspondente autorización da Consellería de Facenda.
