O Concello de Santiago está a avaliar a situación na que quedan as bonificacións ao autobús urbano tras decaer no Congreso, polos votos en contra de PP, Vox e Junts, o Real Decreto Lei Ómnibus no que estaban incluídas.
Así o explicou a tenente de Alcaldesa, María Rozas, que criticou a “lamentable actitude” e a “irresponsabilidade” do Partido Popular “e dos seus socios” ao votar en contra deste Real Decreto. “Unha vez máis, antepoñen os seus intereses e os do seu partido sobre os intereses xerais da cidadanía“, dixo María Rozas, engadindo que isto “non é algo novo” que tamén ocorre en Compostela, “onde o PP está sempre tentando bloquear todo”.
Esta “actitude irresponsable”, apostilou, “sófrea a xente”: “Os pensionistas que non van ver revalorizada a súa pensión, os novos traballadores que non terán un salario mínimo que lles protexa ou os usuarios do transporte público”, sinalou Rozas.
