A Policía Local detivo en Santiago de Compostela a un condutor despois de verse implicado na madrugada do 27 ao 28 de decembro nun accidente con saída de vía e atropelo a un peón, segundo informa o consistorio. Os feitos producíronse pasadas as 1.30 horas na rúa Castela-A Mancha, cruzamento coa de Murcia, cando un turismo se saíu da vía pola marxe esquerda. Debido a iso golpeou a outro vehículo que, á súa vez, impactou contra un terceiro.
O primeiro coche, no seu desprazamento, atrapou contra o segundo a un peón que foi trasladado ao complexo hospitalario universitario de Santiago (CHUS). O condutor deste coche foi detido, investigado pola comisión dos delitos de condución temeraria pondo en perigo a vida e integridade das persoas e lesións por imprudencia con vehículo a motor. Na rúa Hórreo rexistrouse, ademais, un atropelo a unha peatona nun paso de peóns, co resultado da persoa ferida leve, precisan desde o consistorio.
