A alcaldesa de Santiago, Goretti Sanmartín, asegurou que o Concello traballa “a partir deste momento” en analizar a lei de acompañamento aos orzamentos da Xunta para que a taxa turística poida ser “unha realidade o máis pronto posible”.
Así, a preguntas dos medios, a rexedora explicou que, unha vez aprobados os orzamentos da Xunta, o consistorio local examinará “o texto resultante” e, unha vez analizado, ver que “non haxa ningún problema de tipo xurídico” para pola en marcha.
“Desde os servizos municipais comezarase a traballar no desenvolvemento dunha ordenanza que facilite que poida ser cobrada, iso non significa que non teñamos que reiterar que o procedemento, nin pola forma nin polo fondo, parécenos o máis adecuado”, manifestou.
Do mesmo xeito, lamentou que “ao final non se crea un imposto de estancias turísticas”, senón “unha recarga municipal” e óbviase ” a posibilidade de que a Atriga” xestione a taxa.
Sobre esta xestión, Sanmartín insistiu en que “dificulta” a “moitos concellos pequenos interesados en implementar a taxa turística”.
En calquera caso, reiterou que o Concello “se pon a traballar para que poida ser unha realidade o máis pronto posible”. “Pero todo isto necesita un desenvolvemento” que, avanzou, inician “a partir deste momento”.
