O reitor da Universidade de Santiago de Compostela (USC), Antonio López, encabezou este martes unha recepción no Colexio de San Xerome para dar a benvida ás persoas que gozan dalgunha das axudas dos programas de cooperación internacional que ten en marcha a institución.
“Quero expresar o meu máis profundo agradecemento a todos aqueles que fan posible que as persoas que nos atopamos nunha situación tan difícil teñamos a oportunidade de continuar perseguindo os nosos soños“, asegurou Khrystyna Romaniuk, unha moza ucraína beneficiaria das axudas que a USC concede a persoas procedentes de zonas en conflito.
Neste sentido, o reitor da universidade cualificou as súas palabras como “o mellor exemplo da necesidade destes programas”, ademais, felicitou aos estudantes pola súa “forza para tomar esta decisión”.
Segundo indicou a USC nunha nota de prensa, no acto tamén interveu a vicerreitora de Titulacións e Internacionalización, María José López Couso, quen subliñou o compromiso da Universidade no ámbito da cooperación internacional.
Por outra banda, explicou que a cooperación internacional na USC articúlase a través de catro programas, o de ‘Axudas para pesonas procedentes de zonas en conflito’, o de ‘Mulleres por África’, o da Fundación Carolina e o do Ministerio de Asuntos Internacionais e Cooperación coa Axencia Española de Cooperación Internacional para o Desenvolvemento (MAEC-AECID).
