A Xunta e os 18 concellos da área de transporte metropolitano (ATM) de Santiago acordaron este venres prorrogar o convenio para o próximos catro anos. Así se decidiu na comisión de seguimento do Plan de Transporte Metropolitano desta área que presidiu a directora xeral de Mobilidade, Judit Fontela.
Segundo explicou a Xunta nunha nota de prensa, destinaranse máis de 1,2 millóns de euros ao ano, o 80% dos 1,5 millóns do importe total do acordo, mentres que vos municipios achegarán os 288.000 euros anuais restantes.
Deste xeito, a prórroga deste acordo súmase aos xa previstos en áreas como Lugo, Ferrol e A Coruña. Con todo, a ATM de Santiago é unha das que concentra “maior oferta de servizos” e inclúe aos concellos de Ames, A Baña, Boqueixón, Brión, A Estrada, Negreira, Ordes, Oroso, Padrón, O Pino, Rois, Santiago de Compostela, Teo, Touro, Trazo, Val do Dubra, Vedra e Vila de Cruces.
No marco deste convenio, a Xunta lembrou que continuará financiando os descontos do 80% nos billetes interurbanos, ademais da gratuidade dos transbordos. Así como as bonificacións para os usuarios habituais e familias numerosas.
Así mesmo, os veciños dos concellos da área metropolitana de Compostela poderán beneficiarse dos descontos da Tarxeta da Mobilidade de Galicia (TMG), da Tarxeta Xente Nova ou da Tarifa+65 para os usuarios maiores de 65 anos.
