O líder do Partido Popular de Santiago, Borja Verea, denunciou o “deplorable estado” das rúas e estradas compostelás, que están “cheas de fochancas e firmes en mal estado, sobre todo, nas zonas rurais” e reclamou ao goberno local unha “estratexia real”.
Neste sentido, o popular afeou ao BNG “que non faga nada” e reclamou aos nacionalistas que realicen “reparacións urxentes” con arranxos na maioría das rúas e vías rurais, unha iniciativa que, ademais, “poida estenderse ao resto da cidade”.
Segundo destacou o PP nunha nota de prensa, unha “mostra clara” desta situación é o viario de acceso a Casal da Horta, que leva ata Monte Pedroso e que se atopa en “claras condicións de abandono”, polo que urxen ao goberno local a levar a cabo unha “reparación urxente”.
Así mesmo, Verea subliñou os “prexuízos e perigos” que se poden derivar para os vehículos e os peóns polo “mal estado” das estradas, “ademais das reclamacións de responsabilidade patrimonial por danos que se poden producir como consecuencia”.
Con todo, incidiu en que “esta non é a primeira vez” que lle reclaman aos nacionalistas que “traballen, saian dos seus despachos e póñanse a solucionar os problemas dos veciños”.
