A alcaldesa de Santiago, Goretti Sanmartín, e o presidente da Deputación da Coruña, Valentín González Formoso, asinaron o convenio para financiar as actividades do Auditorio de Galicia durante 2024. Así o fixeron na mañá deste venres onde tamén asinaron o acordo para acondicionar a antiga escola de Villestro como Centro de Interpretación de Arte Rupestre.

A rexedora compostelá agradeceu estas dúas colaboracións que, segundo apuntou Formoso, suman un investimento de 425.000 euros para potenciar a oferta cultural e patrimonial de Santiago.

Neste sentido, a Deputación farase cargo de financiar o 80% das actividades do Auditorio de Galicia e achegará 225.000 euros, o 100% do orzamento, ao acondicionamento do local de Villestro.