O líder do Partido Popular en Santiago, Borja Verea, mostrou a súa “sorpresa” ante as críticas da alcaldesa da cidade, Goretti Sanmartín, á subida do canon que propón Sogama. Neste sentido, asegurou que tanto a rexedora como o BNG son “responsables” deste incremento debido ao seu “apoio” a Pedro Sánchez.
Deste xeito, Verea esgrimiu que o que “ten que facer” Sanmartín é “buscar outro tipo de aliados” ou ser responsables cando toman decisións que despois “teñen repercusións en todos os cidadáns”.
Por outra banda, Sogama, empresa dependente da Consellería de Medio Ambiente, considera “necesario” aplicar unha subida no canon que pagan os municipios, que pasará aos 108 euros por tonelada de cara a 2025, no canto dos 66 actuais.
Con todo, durante unha rolda de prensa celebrada este martes no Pazo de Raxoi, Verea puxo o foco en que este é un “imposto estatal”, polo que reiterou que a rexedora compostelá tamén é reponsable desta subida.
“Estamos moi sorprendidos de que a propia responsable deste imposto sexa a que está ao criticar e que fale dun sablazo, cando no último mes contratou a un novo asesor, polo que xa van 14 asesores”, denunciou o popular.
Neste sentido, Verea asegurou que hai “moito escurantismo” e “ningunha transparencia” sobre unha cuestión “tan sensible” como é a contratación “a dedo” de persoal municipal co diñeiro de “todos os cidadáns”.
“A CARA MOI GRANDE”
Así mesmo, afeou á alcaldesa que se “ría” dos cidadáns e convoque roldas de prensa para criticar “a subida dun imposto” da que é a “principal responsable”.
“Hai que ter a cara moi grande para dar unha rolda de prensa criticando un imposto do que es responsable, polo que ten que facer o goberno local é falar co seu socio e retirar ese imposto, máis que facer espectáculos de roldas de prensa”, subliñou. Con todo, incidiu en que Santiago xa hai “problemas suficientes” como para “inventar” problemas novos.
