A alcaldesa de Santiago de Compostela, Goretti Sanmartín, manifestou este venres o seu rexeitamento á proposta de subida do canon por parte de Sogama para a xestión de residuos. Sanmartín cualificou de “escandalosa” e “desproporcionada” esta medida, que segundo as súas estimacións, suporá un custo adicional de case un millón de euros ao ano para a capital galega.
A empresa Sogama, dependente da Consellería de Medio Ambiente, propón incrementar o canon dos actuais 66 euros por tonelada a 108 euros en 2025, argumentando que a tarifa actual “apenas cobre a metade do custo real” do servizo. No entanto, a rexedora compostelá criticou duramente este incremento, ao considerar que se basea nun modelo de xestión de residuos que cualificou de “obsoleto, custoso e contaminante”.
Sanmartín tamén destacou que a Xunta de Galicia coñece desde hai anos que o modelo actual de xestión de lixo “non é sustentable”, e anticipa que a maioría dos concellos galegos se pronunciarán en contra desta medida. Neste sentido, avanzou que o goberno municipal de Santiago “impedirá” que esta subida se leve a cabo e buscará o apoio doutros concellos para frear esta decisión que considera inxustificada.
