A alcaldesa de Santiago, Goretti Sanmartín, celebrou o acordo entre a Xunta e o Goberno de abrir unha canle de comunicación “fluída e constante” para a coordinación do traslado de inmigrantes a Galicia e insiste en que a capital galega é unha cidade “acolledora e hospitalaria”.

A preguntas dos medios este venres nunha visita á Praza de Abastos, a rexedora sinalou que para o concello compostelán a situación “xa estaba máis que desbloqueada”. “Dixemos desde o primeiro momento que iamos colaborar, que non se pode xogar coas persoas que están a sufrir unha crise, fuxindo dos seus lugares de procedencia, e que o Concello sempre vai estar”, afirmou.

Nesta liña, reivindicou que “calquera colaboración entre administracións” debe ser “a maneira de proceder en todos e cada un dos asuntos“, pero, engadiu, “moito máis cando se fala de temas de refuxiados, de xente que ten que irse dos seus fogares”.

Así mesmo, explicou que estas persoas chegarán a partir do 25 de xullo “de maneira graduada”. Neste sentido, cuestionada sobre se podería afectar o dispositivo das Festas do Apóstolo, Sanmartín argumentou que existe “un reforzo” nos servizos de emerxencia e policiais e, “se chegan o 25 de xullo e hai que atender a iso, tamén se fará”.

“A pesar de que haxa festas, que imos estar e a gozar delas, o certo é que tanto as guerras, como as crises de emigración non teñen data, infelizmente, e hai que estar alí as distintas administracións para botar unha man”, aseverou. Segundo as últimas informacións, está previsto que uns 200 migrantes cheguen a partir do 25 de xullo ao albergue Monte do Gozo, na capital galega.