O que foi coordinador do PSOE provincial da Coruña Moisés Rey será o encargado de instruír o expediente aberto polo partido aos membros do Grupo Municipal de Santiago que romperon nun pleno do Concello a disciplina de voto marcada pola dirección local para unha ordenanza sobre a comunicación de vivendas de uso turísticos.
A dirección provincial do PSOE explicou que acordou, a través do seu secretario de Organización provincial, Diego Fernández López, designar como instrutor do expediente a este socialista, que foi varios anos Coordinador Provincial e conta con “unha ampla experiencia” dentro do Partido Socialista.
Ademais de tenente de Alcalde no Concello de Arteixo, do que é natural, foi vicepresidente da Deputación da Coruña durante a etapa de Salvador Fernández Moreda na Presidencia. Fontes socialistas consultadas por Europa Press incidiron en que se trata dun procedemento totalmente garantista e puxeron en valor a figura de Moisés Rey para instruír o expediente, tendo en conta que se trata dun militante “amplamente respectado no partido” e cunha recoñecida traxectoria.
Corresponde agora ao instrutor escoitar ás persoas inmersas neste procedemento, para determinar se os feitos que dan lugar á apertura do expediente incumpren e, de ser o caso, en que grao, as normas disciplinarias dos estatutos do partido, así como as sancións que poidan corresponder. Tras iso, a dirección federal do PSOE será a encargada de resolver o expediente.
CRISE NO PSOE COMPOSTELÁN
O conflito aberto no PSOE compostelán estalou o pasado 24 de xullo, data na que o seis concelleiros socialistas no Concello de Santiago desafiaron no pleno municipal a directriz da dirección local de optar pola abstención na ordenanza sobre a comunicación das vivendas de uso turístico e situáronse a favor da medida.
De forma paralela, nesa mesma xornada, a dirección local aprobou o cambio do xefe de prensa e a xefa de gabinete que traballan para a formación no Concello de Santiago e deu cinco días ao portavoz municipal, Gonzalo Muíños, para que formalizase as substitucións ou procedería a incoarlle as correspondentes dilixencias disciplinarias. Con todo, o portavoz non chegaría a executar o cesamento dos dous traballadores, de confianza dos integrantes do grupo municipal.
