A Comisión Especial de Transporte Público en Vehículos de Turismo (CEVT) do Consello Galego de Transportes analizará o próximo 23 de xullo a ampliación de licenzas de taxi no Concello de Santiago de Compostela. Este será un dos asuntos previstos na orde do día da reunión convocada pola Xunta para ese día, segundo anunciou este xoves nun comunicado o Goberno galego.
En concreto, o Concello solicitou un incremento de 29 novas licenzas, para pasar de 147 a 176. Respecto diso, o Executivo lembrou que esta petición ten que ter o informe do Consello Galego de Transportes, dependente da Xunta, polo que se convocou esta comisión especial. Ademais, o estudo presentado polo goberno local ten que pasar un proceso de audiencia coas asociacións máis representativas do sector, sindicatos e asociacións de consumidores e usuarios. Unha vez emitido o ditame do Consello, a Dirección Xeral de Mobilidade encargaríase da avaliación da proposta e emitiría un informe preceptivo e vinculante.
