O BNG rexistrou novas iniciativas para demandar ao Goberno que tome medidas ante a “perda de calidade” do servizo de Correos en Santiago de Compostela. O deputado do Bloque no Congreso, Néstor Rego, esixiu ao Executivo contratar persoal para cubrir as prazas vacantes, reforzar e mellorar o CTA de Lavacolla e dotalo de maior capacidade de tratamento postal, “un ano e medio despois de que decidisen centralizar parte do servizo en Valladolid”.
Segundo aseguraron os nacionalistas, “o recorte de medios tecnolóxicos e a falta de persoal” neste centro está a ocasionar “unha perda de calidade no servizo postal”. “Os recortes en medios xunto á endémica falta de persoal, ás baixas que non se cobren e os períodos de vacacións, están a crear moitos problemas de atrasos e atascos na repartición do correo postal”, apuntou Rego.
Así, tal e como apunta o deputado, o BNG xa advertiu de que “o traslado do centro operativo a Valladolid” sería “o inicio do progresivo desmantelamento das instalacións” do CTA de Lavacolla. “O servizo de repartición debe buscar a maior calidade e proximidade co fin de garantir a eficacia e eficiencia. Desde o punto de vista económico, racional e de efectividade, non se entenden os motivos de Correos para trasladar a clasificación postal do correo de Galicia ata Valladolid”, criticou.