A exconcejala do PP en Santiago María Pardo, que tivo responsabilidades de goberno entre 2011 e 2014, faleceu na madrugada deste sábado, segundo confirmaron fontes populares. Polo momento, será velada na casa familiar de Rábade. O funeral será o domingo ás 16:00 horas.
Ante a noticia, o Concello expresou as súas condolencias á súa familia, persoal e política, e a todas as súas amizades. A alcaldesa, Goretti Sanmartín (BNG), tamén trasladou persoalmente un abrazo aos seus achegados: “Unha mágoa para Compostela. Que a terra lle sexa leve!”. Tamen o PP compostelán, ante o empeoramento da súa saúde, lembrouna a pasada tarde como un “exemplo nos anos máis difíciles” e polo seu “rigor e valentía”. “Deu a cara e deixou legado sen buscar aplausos”, apreciou.
TRAXECTORIA POLÍTICA
Pardo foi concelleira de Urbanismo e portavoz do goberno local entre 2011 e 2014. Nese tempo, foi impulsora de proxectos como os parques infantís das prazas de Galicia e de Vigo e tivo responsabilidades na xestión municipal do accidente de Angrois, que ocorreu en xullo de 2013.
A popular deixou os seus cargos en 2014, cando dimitiu en bloque xunto a outro seis edís imputados e condenados inicialmente por prevaricación nunha causa relacionada coa Operación Pokemón e da que finalmente foron todos absoltos en 2015. Pardo afastouse da política e, desde 2018, exercía como directora executiva de Administración na consultora tecnolóxica MinData, con sede na capital galega.
