O candidato do PSOE á Alcaldía de Santiago, Pedro Blanco, mostrouse este martes “convencido” de que os socialistas composteláns están “cohesionados” para alcanzar o bastón de mando do Pazo de Raxoi. A preguntas dos medios nun acto no CiTIUS, o tamén delegado do Goberno asegurou que a formación está “absolutamente ilusionada” e traballa xa nun programa co que pretende “darlle a volta completamente a Santiago”. Blanco explicou que, polo momento, o partido está centrado na elaboración do programa electoral, que definiu como “completamente novo” para unha cidade que, ao seu xuízo, “necesita aires novos”.
“ORDENAR A CASA” COMO PRIMEIRA MEDIDA
O candidato socialista afirmou que o primeiro que fará se chega á Alcaldía será “ordenar a casa” e escoitar as necesidades dos traballadores públicos municipais. “É imposible que avance Santiago se non somos capaces de pagar as facturas, se temos licenzas que non se dan resolto”, esgrimiu. Como segunda prioridade, Blanco situou a mellora dos servizos públicos, especialmente o servizo de limpeza, un servizo de mobilidade adecuado e a necesidade de afrontar o problema da vivenda.
BESTEIRO RESTA IMPORTANCIA Á CANDIDATURA DE MERCEDES ROSÓN
Pola súa banda, o secretario xeral do PSdeG, José Ramón Gómez Besteiro, foi preguntado pola posible incidencia da candidatura da exconcelleira socialista Mercedes Rosón no voto do PSOE compostelán. Besteiro rexeitou que esta situación afecte os socialistas e defendeu que o partido está centrado no seu propio proxecto. “Non nos afecta o que fagan terceiras persoas. Por suposto, estamos tan convencidos de que o noso camiño é adecuado e correcto que o que fagan os demais tampouco nos debe ocupar, ocupámonos do noso”, reivindicou.
O líder do PSdeG puxo en valor o camiño “ilusionante” que, segundo afirmou, abre Pedro Branco para converter Santiago nunha capital “puxante, innovadora”, que aposte pola pluriculturalidade, pola innovación e por ser unha cidade “punteira”. Para Besteiro, cunha mensaxe dese tipo, “o que fagan os demais” non debe ser obxecto de xuízo nin de preocupación para os socialistas composteláns.
