A secretaria xeral do PPdeG, Paula Prado, manifestou que “a única alternativa de cambio” en Santiago de Compostela, de face ás próximas eleccións municipais, é o candidato popular Borja Verea.
Así o manifestou, a preguntas dos xornalistas, nunha comparecencia ante os medios de comunicación e no día en que transcendeu que o delegado do Goberno en Galicia, Pedro Blanco, deu un paso á fronte para ser o candidato do Partido Socialista á Alcaldía de Santiago de Compostela coa presentación da súa precandidatura no proceso de primarias aberto pola formación.
“Dá igual quen se presente por cada unha das formacións políticas, todos son o mesmo”, sinalou a dirixente popular ao ser cuestionada polo citado proceso electoral.
“Todo se reduce a Borja contra todos”, sentenciou Paula Prado para insistir en que “a única alternativa de cambio na cidade de Santiago ten un nome, Borja Verea”.
