A Deputación da Coruña prevé reforzar a súa colaboración coa Universidade de Santiago de Compostela, segundo avanzou o presidente provincial, Valentín González Formoso, tras manter un encontro coa reitora Rosa Crujeiras na sede da institución provincial.
Durante a reunión, Formoso incidiu na relación mantida entre ambas institucións e destacou o papel da nova reitora á fronte da universidade compostelá. “É a primeira muller que asume un cargo tan importante, sempre tivemos unha relación bilateral moi construtiva e traballando en todos os ámbitos”, sinalou.
O presidente da Deputación fixo balance das actuacións desenvolvidas nos últimos anos e explicou que o actual goberno provincial destinou tres millóns de euros ao apoio de diferentes proxectos ligados á actividade universitaria. Segundo detallou, os investimentos abrangueron iniciativas científicas relacionadas con ámbitos diversos, desde o sector primario ata áreas tecnolóxicas, ademais doutras actuacións vinculadas ao coñecemento e a innovación.
Tamén destacou actuacións relacionadas coa mellora de equipamentos e infraestruturas. “Participamos coa mellora de infraestruturas deportivas e culturais con tres millóns de euros desde que asumimos o goberno provincial e imos incrementar a nosa colaboración”, afirmou.
Pola súa banda, Crujeiras puxo o foco en distintos programas desenvolvidos en colaboración entre ambas entidades e resaltou iniciativas como a universidade de maiores, os programas orientados ao estímulo do talento matemático ou as accións destinadas á captación e impulso de proxectos de transferencia do coñecemento.
A reitora tamén subliñou a importancia da cooperación institucional para ampliar o impacto social da actividade universitaria. “É moi relevante contar co apoio das institucións para chegar a toda a sociedade crítica e informada e cohesionada”, destacou.
INVESTIGACIÓN INTERNA NA USC POLA EXCLUSIÓN NAS BOLSAS RAMÓN Y CAJAL
Noutra orde de cousas, a reitora Rosa Crujeiras avanzou que a institución revisará e reforzará as estruturas de apoio á xestión universitaria tras a exclusión da universidade da listaxe de centros que podían acoller persoal investigador seleccionado no programa Ramón y Cajal. Crujeiras explicou que a convocatoria foi tramitada antes da chegada do novo equipo reitoral e confirmou a apertura dunha investigación interna para esclarecer o sucedido.
A responsable académica asegurou que a análise continúa aberta e incidiu na necesidade de adoptar medidas para evitar que unha situación similar se repita no futuro. Ademais, advertiu de que esta circunstancia afecta á capacidade de desenvolvemento dos centros e departamentos de investigación da universidade, polo que a prioridade pasa por “tratar de paliar esta situación” e reforzar os mecanismos de xestión.
