O voceiro do Grupo Municipal Socialista no Concello de Santiago, Gumersindo Guinarte, valorou a aprobación en Xunta de Goberno Local do proxecto de orzamentos municipais para 2026, pero advertiu de que o executivo local non conta polo momento cos apoios necesarios para garantir a súa aprobación definitiva no pleno.

Guinarte lembrou que a propia alcaldesa, Goretti Sanmartín, recoñeceu publicamente que o Goberno municipal non ten pechados os respaldos precisos para sacar adiante o documento económico. Neste contexto, explicou que nas últimas semanas se desenvolveu un proceso de negociación entre ambas as partes no que o PSdeG trasladou unha relación ampla de iniciativas.

Segundo detallou, “nos estivemos nun proceso de negociación co Goberno Municipal, presentamos unha listaxe de propostas exixentes, máis de 70 propostas”, que inclúen tanto medidas de carácter político como compromisos vinculados á xestión municipal.

PROPOSTAS CON E SEN IMPACTO ECONÓMICO

O dirixente socialista precisou que dentro desa relación existen actuacións que non implican necesariamente unha consignación económica directa, pero que requiren un compromiso político por parte do executivo. Ao mesmo tempo, indicou que outras iniciativas si precisan encaixe nas contas municipais, polo que a súa incorporación ao texto definitivo será determinante para fixar a posición do grupo.

Guinarte insistiu en que, a día de hoxe, o diálogo non pode darse por rematado. “Esa negociación con nós non está evidentemente cerrada, no sentido de que haxa un acordo”, afirmou, deixando claro que non existe ningún compromiso pechado sobre o sentido do voto socialista.

O voceiro sinalou que será no propio debate plenario cando o grupo adopte unha decisión definitiva. “Iso significa que, cando se produza o debate, nós valoraremos en que medida o Goberno Municipal incorporou as nosas exixencias, en que medida forman parte do orzamento”, explicou, engadindo que “iso será o que determine a nosa posición de voto”.

TODAS AS OPCIÓNS ABERTAS

Desde o Grupo Municipal Socialista subliñan que, neste momento, “todas as posicións e todas as posibilidades están abertas”. A decisión final dependerá, segundo indicou Guinarte, “en función de cal fora a receptividade do Goberno Municipal as nosas propostas que coñece perfectamente”.

Os socialistas reiteran que a súa postura estará condicionada pola inclusión efectiva das medidas que consideran prioritarias para a cidade de Santiago e que o eventual apoio ás contas de 2026 esixirá compromisos concretos e verificables. Mentres tanto, a negociación continúa aberta á espera do debate plenario no que se definirá o futuro dos orzamentos municipais para o vindeiro exercicio.