O portavoz do PP en Santiago, Borja Verea, volveu este luns a cargar contra o executivo municipal ao considerar que a cidade atravesa unha situación “crítica” en varios ámbitos da xestión local. Tras reunir ao Comité Executivo da formación, o líder popular sostivo que o episodio vivido o pasado sábado —un incendio nunha vivenda de Pontepedriña que deixou dúas persoas feridas— evidenciou que o parque de bombeiros estivo “inoperativo” por primeira vez na historia da capital galega, algo que cualificou como “razón suficiente” para que a alcaldesa, Goretti Sanmartín, abandone o cargo.
Segundo explicou, o suceso “podería ter acabado en perda de vidas humanas”, polo que atribuíu ao Goberno local unha falta de capacidade para garantir a seguridade cidadá. Verea afirmou que o executivo formado por BNG e Compostela Aberta, e sustentado polo PSOE, mantén a cidade “nunha situación límite en todos os departamentos”. “Que máis ten que pasar?”, preguntou durante a súa intervención, na que acusou a alcaldesa de “pór en risco a vida dos santiagueses”.
O dirixente popular defendeu que o grupo municipal xa trasladou ao Goberno local que é posible contratar máis persoal policial e do servizo de extinción, e que mesmo a CIG lles deu “a razón” nesa interpretación. Verea vinculou esta crise ao “mal funcionamento” doutros servizos municipais, como os centros socioculturais ou a limpeza viaria, que tamén situou como exemplos do que considera un deterioro na prestación dos servizos públicos.
Outro dos puntos sinalados polo PP é o expediente que irá ao Pleno extraordinario deste venres para aboar máis de 2 millóns de euros en horas extra acumuladas por bombeiros e policías locais. Verea sostivo que ese pagamento é “ilegal” e unha “completa chapuza”, e animou a consultar os informes técnicos porque, ao seu xuízo, “son o mellor retrato dun goberno que non sabe o que é xestionar”.
O portavoz concluíu pedindo a dimisión “inmediata” da rexedora e asegurou que, se o Goberno local solicita apoio, o PP está disposto a ofrecelo. Aínda así, insistiu en que a responsabilidade última da situación recae na alcaldesa: “En calquera administración, presentar un pago de horas extra con todas esas ilegalidades acumuladas sería motivo para asumir responsabilidades, pero sabemos que non o van facer”.
