O Goberno local de Santiago, formado por BNG e Compostela Aberta, mantivo este xoves unha reunión co Grupo Municipal Socialista no marco do proceso de elaboración dos orzamentos para 2026.
A alcaldesa, Goretti Sanmartín, presidiu o encontro, no que tamén participaron a tenente de alcaldesa, María Rozas, a portavoz do Goberno, Míriam Louzao, e o concelleiro de Facenda, Manuel César. Segundo explicou o Executivo municipal, a reunión, que durou máis dunha hora, serviu para facer balance dos compromisos asumidos para a aprobación das contas municipais. Entre os avances, destacan a posta en marcha da recarga municipal sobre o imposto de estancias turísticas e medidas vinculadas á vivenda, como a reserva de polo menos o 45% de vivenda protexida no centro e a solicitude de declaración de Santiago como zona de mercado residencial tensionado.
Porén, o portavoz socialista, Gumersindo Guinarte, advertiu que existen acordos pendentes, como a xestión da auga, o contrato de transporte, a cuberta do pavillón do IES de Fontiñas, a reforma do pavillón de Lamas de Abade e o complexo deportivo de Santa Marta, que aínda non se puxeron en marcha. Guinarte insistiu na importancia de cumprir estes compromisos antes de iniciar novas negociacións, asegurando que o PSOE permanecerá vixiante para que os acordos pendentes se materialicen canto antes.
