O Goberno local de Santiago, formado por BNG e Compostela Aberta, iniciou este mércores as negociacións previas á elaboración dos orzamentos municipais de 2026 cun primeiro encontro cos edís non adscritos, antigas concelleiras socialistas que actúan como socias preferentes do executivo.
Segundo informou Raxoi nun comunicado, na reunión participaron a alcaldesa, Goretti Sanmartín, a tenente de alcaldesa, María Rozas, a portavoz do Goberno, Míriam Louzao, e o concelleiro de Facenda, Manuel César Rodríguez, xunto coas dúas concelleiras non adscritas. O obxectivo foi facer balance do grao de cumprimento dos acordos asinados en xaneiro e abrir o proceso de diálogo para as novas contas municipais.
Dende o Goberno municipal destacouse que se avanzou en varios compromisos: a aprobación e posta en marcha da recarga municipal sobre o imposto de estancia turística, o desbloqueo da antiga parcela do colexio Peleteiro, a nova solicitude de zona de mercado residencial tensionado e o lanzamento do concurso de ideas para transformar o conector central da cidade.
Raxoi subliñou tamén o progreso na comarcalización do parque de bombeiros, o aumento da taxa de reposición ao 125 % en bombeiros e policías e a tramitación dos contratos do transporte urbano, do ciclo da auga e dos centros socioculturais. Ademais, destacou a consolidación do Plan anual de conciliación 2025–2026, a adxudicación da Casa das Mulleres Xohana Torres e do servizo LGBTIQ+, así como a elaboración dun Plan de Saúde municipal xunto coa Universidade de Santiago.
Pola súa banda, as concelleiras non adscritas cualificaron o encontro de “decepcionante” e aseguraron que o grao de execución do acordo non está á altura das circunstancias. O seu portavoz, Gonzalo Muíños, sinalou que é “indignante o estado no que se atopan os proxectos considerados estratéxicos para este 2025” e afirmou que, mentres elas cumpriron coas súas obrigas —como o desbloqueo da operación Peleteiro e a aprobación da taxa turística—, “lamentablemente o Goberno local non cumpriu coa súa parte”.
Muíños tamén criticou os atrasos no seguimento do pacto, que debía ser trimestral, lembrando que esta foi “a primeira reunión despois de pedila publicamente o 12 de setembro”. As non adscritas amosáronse “especialmente críticas” coa execución de investimentos previstos en 2024 e reincorporados ás contas de 2025, como a licitación do Complexo Deportivo de Santa Marta ou a renovación do céspede do campo de fútbol de Villestro.
Ademais, denunciaron a paralización de proxectos de espazos públicos, como a cuberta do parque infantil da rúa Lisboa, a renovación dos parques da rúa Manuel Beiras en Conxo e o de Angrois, indicando que “o único que se lles traslada é que están á espera dunha achega de Adif para o de Angrois”.
No ámbito do transporte urbano, acusaron ao executivo de incumprir “todos os prazos” da nova licitación e de manter “sen reforzar” os cadros de persoal da Policía Local e dos Bombeiros, con 12 prazas sen convocar. Tamén censuraron a falta de avances na creación da empresa pública de vivenda e chan e na tramitación da zona de mercado tensionado, o que, segundo apuntan, supón “un ano perdido” para actuar sobre os prezos do alugueiro.
Os non adscritos concluíron manifestando a súa preocupación pola baixa execución orzamentaria e instaron a abrir unha “reflexión sobre o rumbo dos próximos dous anos” no marco do mandato municipal.
