Compostela Aberta rexeitou “cotas partidarias” para a elaboración da súa candidatura para as eleccións municipais de 2027, cuxo proceso de conformación deixou claro que “non iniciou” aínda. Así o trasladaron fontes da formación ao ser preguntadas polas declaracións concedidas polo secretario xeral do Movemento Sumar Galicia, Paulo Carlos López, ao xornal El Correo Galego, nas que asegura que “Compostela Aberta, os ‘rosonistas’ e Sumar deben ir xuntos ás municipais”.
Preguntadas respecto diso, estas fontes subliñan que Compostela Aberta foi desde o seu nacemento, e segue sendo, “un punto de encontro entre diferentes sensibilidades da esquerda“. Así, trasladan que a vontade manifestada polos órganos de dirección é “respectar ese modelo co que a organización mantén un espazo consolidado” en Santiago.
“A día de hoxe non está aberto ningún proceso de conformación da candidatura para as eleccións municipais de 2027, e serán os órganos de dirección de Compostela Aberta os que decidan en que momento se abre o proceso, que a organización nunca abordou en clave de cotas partidarias e si desde si desde o diálogo con todas as partes“, subliñaron. Ademais, preguntados respecto diso, os edís non adscritos no concello de Santiago, entre os que se atopa Mercedes Rosón, rexeitaron pronunciarse polo momento sobre a postura trasladada polo secretario xeral do Movemento Sumar Galicia.
