O presidente da Xunta de Galicia, Alfonso Rueda, instou ao Concello de Santiago a ofrecer canto antes unha resposta á proposta de comarcalización do parque de bombeiros da capital galega, unha medida que implicaría tamén cambios na xestión dos recursos humanos.
Rueda pronunciouse así este luns tras ser preguntado polos medios sobre a situación do parque municipal de bombeiros, que segundo denuncian os propios efectivos permanece inoperativo pola falta de persoal. O mandatario autonómico recoñeceu que esta carencia obrigou nalgúns momentos a complementar os servizos con efectivos procedentes dos consorcios provinciais e de Protección Civil.
O presidente lembrou que o Concello compostelán ten “desde hai tempo” sobre a mesa unha proposta para integrar o servizo no modelo comarcal, o que convertería o parque de Santiago no centro matriz da área. “Tanto a Xunta como a Deputación da Coruña estaban de acordo nisto, pero a día de hoxe non se materializou”, afirmou.
Ante a falta de avances, Rueda reclamou ao Goberno local que, tras “todos estes meses que xa pasaron sen ter unha resposta”, dea unha contestación definitiva e concrete se ten intención de adherirse ao proxecto, pensado para mellorar a coordinación e a cobertura territorial en materia de emerxencias.
