O portavoz do grupo municipal socialista en Santiago, Gumersindo Guinarte, cualificou de “claramente insuficiente” o incremento anunciado polo Partido Popular da achega que os orzamentos da Xunta de Galicia para 2026 destinarán á cidade en virtude da Lei do Estatuto de Capitalidade.
“É unha cantidade claramente insuficiente, eu diría mesmo que é unha cantidade pírrica. Unha cantidade que está por baixo, moi por baixo, do que os informes da Universidade de Santiago estableceron como que era a cantidade razoable que os orzamentos de Galicia debían achegar a Santiago de Compostela”, denunciou.
Nesta liña, lembrou que o Goberno galego prevé aumentar en 400.000 euros a cantidade asignada, unha subida que, a xuízo do socialista, “non responde as necesidades reais da capital galega nin ao que determinaron estudos académicos”.
Así mesmo, Guinarte incidiu en que a cifra proposta pola Xunta “queda aínda por baixo da que a Comunidade Autónoma achegaba a Santiago de Compostela no ano 2009, precisamente cando a Xunta de Galicia pasou a mans do Partido Popular”. En concreto, Santiago recibirá tres millóns de euros en concepto de capitalidade.
“Despois de 15 anos, a Xunta de Galicia propón achegar menos a Santiago do que xa achegaba no ano 2009. Hai máis de 15 anos. Esta Xunta de Galicia do Partido Popular non respecta a capital de Galicia”, concluíu o portavoz socialista.
