A concelleira socialista Marta Abal acusou este xoves ao goberno municipal de Santiago, presidido pola alcaldesa Goretti Sanmartín, de “improvisar” na xestión dos comedores escolares e de manter “unha falta total de planificación e transparencia” sobre o futuro deste servizo, cuxo contrato remata o 30 de xuño de 2026 sen posibilidade de prórroga.
Abal advertiu de que “en menos dun ano e medio finalizará un contrato do que dependen máis de 1.000 comidas e 300 almorzos diarios”, e criticou que “tras máis de dous anos de mandato, o executivo local non fixo pública ningunha proposta nin iniciou os trámites para garantir a continuidade do servizo no curso 2026-2027”.
Segundo a edil socialista, “estamos ante un servizo esencial para a alimentación, a saúde e a conciliación de centos de familias compostelás”, polo que reclamou unha “planificación real e transparente” por parte do goberno bipartito.
O grupo socialista pediu tamén que se verifique o control do contrato actual e o cumprimento dos compromisos da empresa concesionaria. “Queremos saber se se respectan cuestións básicas como as ratios de monitores e as melloras ofertadas pola empresa: o 50 % de produto fresco, o 70 % de produto de tempada e outro 70 % de produto da contorna”, indicou Abal, lembrando que “sen control non hai calidade”.
A concelleira lamentou igualmente que non exista información sobre o futuro modelo de xestión, nin sobre a localización da cociña central, a licitación da obra ou o cronograma de execución, que —subliñou— “debería estar rematado en setembro de 2026”. Tamén cuestionou a falta de previsión en materia de compra, distribución e persoal, e a ausencia dunha avaliación económica que determine “se vai aumentar o prezo que pagan as familias e en que medida”.
“IMPROVISANDO E CON OPACIDADE”
Abal criticou que tanto o Concello como a Xunta eludan responsabilidades sobre o servizo. “Nós defendemos que debería asumilo a Xunta, como ocorre noutros municipios, porque forma parte do currículo educativo, pero nin está nin se espera”, declarou.
A portavoz socialista concluiu que “estes son servizos esenciais que requiren planificación e non opacidade”, e advertiu de que “o que nos tememos é que non é só falta de transparencia, senón improvisación”.
O grupo municipal socialista instou o goberno local a que antes de que remate o ano faga pública toda a información relativa á cociña central, os prazos de construción, o modelo de compra e o impacto económico global do novo servizo. “E se a cociña non chega a tempo, que nos digan cal é o plan B”, concluíu Abal.
