O próximo 21 de outubro celebrarase en Santiago de Compostela unha reunión da delegación española no Comité Europeo das Rexións na que se debaterá un cambio na fórmula de financiamento dos territorios. Segundo anunciou a Xunta este martes, o encontro foi convocado polo presidente da Comunidade galega, Alfonso Rueda, que tamén preside a delegación española, para que as autonomías teñan a posibilidade de “expor as súas posicións particulares”. Así mesmo, pasado o encontro a Xunta trasladou que haberá “unha declaración común para ser defendida en Bruxelas”.
A PROPOSTA
A Xunta explica que o pasado 16 de xullo a presidenta da Comisión Europea, Ursula von der Leyen, presentou a súa proposta para o Marco Financeiro Plurianual (MFP) 2028-2034 para a Unión Europea. Nesta posible nova formulación do órgano executivo, o orzamento alcanzaría os 2 billóns de euros, un 1,26 % da renda nacional bruta media da Unión Europea para ese mesmo período. Tal e como indica a Xunta, os datos “supoñen un lixeiro aumento respecto ao orzamento anterior”, con todo as comunidades autónomas “mostraron o seu desacordo con este novo enfoque”.
RESPOSTA DA DELEGACIÓN
En calidade de presidente da delegación española, Rueda entregou un documento coa posición común das comunidades ao comisario de Cohesión e Reformas, Raffaele Fitto. Niso, as 17 comunidades “recoñecían a importancia da política e os fondos de cohesión para o desenvolvemento e a redución das diferenzas entre rexións europeas”, e así “manifestaban a súa preocupación pola deriva do debate sobre o MFP 28-34”. A administración galega e do resto das autonomías consideran que a Política de Cohesión que se desenvolveu en parte debido a plans rexionais “demostrou ser unha ferramenta adecuada para alcanzar o obxectivo de reducir as disparidades entre os territorios”.
Nesta liña, o titular da Xunta tamén “defendeu o labor que se realiza desde as comunidades” e alegou que “Galicia é un exemplo de boas prácticas e eficiencia no momento da aplicación destes instrumentos de financiamento”. Con todo, o Goberno galego argumenta que a “centralización da repartición e xestión destes fondos non só é contraproducente a nivel organizativo, senón que implicaría que o acceso das rexións a estes fondos sería máis complexo”.
