O PP de Santiago reclamou este luns a dimisión do concelleiro de Mobilidade, Xan Duro, tras denunciar que os traballadores dos centros socioculturais da cidade levan dous meses sen cobrar as súas nóminas. O concelleiro popular, José Ramón de la Fuente, afirmou en rolda de prensa no Pazo do Raxoi que esta situación evidencia a “lamentable xestión” do concelleiro e asegurou que a falta de pagos está a afectar o desenvolvemento das actividades programadas nos centros. Ademais, acusou ao Concello de desviar 100.000 euros dos orzamentos destinados a investimentos nos centros para outros fins.
De la Fuente sinalou que o PP solicitou acceso aos expedientes e informes técnicos e xurídicos sobre o servizo, pero que non recibiron resposta por parte do consistorio, polo que tamén pediron á alcaldesa Goretti Sanmartín que se involucre directamente para asegurar que se poida levar a cabo a licitación do procedemento.
En resposta ás acusacións, a portavoz do Goberno municipal, Míriam Louzao, afirmou que o expediente do novo contrato dos traballadores “está na súa fase final” e que non teñen constancia de nóminas sen pagar. Louzao explicou que se están a agardar os últimos informes precisos para poder iniciar a licitación e que se confía en que nos próximos días se poida pór en marcha o proceso.
