A responsable do departamento de Protocolo do Concello de Santiago presentou a súa dimisión, segundo confirmaron fontes municipais a Europa Press, nun contexto marcado pola controversia en torno á ausencia da alcaldesa Goretti Sanmartín na entrega da Medalla de Galicia a Leonor de Borbón. A renuncia prodúcese dúas semanas despois de que a rexedora atribuise ao seu equipo unha “falta de contraste” na xestión da súa presenza institucional no evento.
A noticia da dimisión fixo pública este mércores o portavoz do PP, Borja Verea, durante o pleno municipal, aínda que nun ton interrogativo: “Non se se é certo. Gustaríanos saber se dimitiu e a causa”, manifestou. O edil chegou a cuestionar se a decisión foi unha reacción digna ante “as falacias da alcaldesa” ou se responde a outros motivos.
A alcaldesa compostelá evitou confirmar directamente a dimisión, pero si recoñeceu que existiu unha “mala comunicación” entre o seu gabinete e o servizo de Protocolo, e asumiu persoalmente o erro: “Esa comunicación necesitaba un contraste posterior que non se produciu”, indicou, reiterando que ela mesma expresara a vontade de asistir ao acto “antes de recibir ningunha invitación expresa dun acto aparte, creado unicamente para enxalzar a monarquía”.
Sanmartín precisou tamén que a persoa agora dimitida formaba parte do persoal eventual e non era funcionaria, subliñando que se trata dunha praza que nunca existiu como tal no cadro de persoal, pero que o Concello ten intención de regularizar.
O debate tivo lugar durante a discusión dunha moción de reprobación presentada polo PP, que foi aprobada cos votos favorables dos populares, do PSOE e dos edís non adscritos. Os portavoces da oposición coincidiron en criticar tanto a ausencia da alcaldesa como a súa explicación posterior.
O popular José Antonio Constenla cualificou a non asistencia como unha “ausencia inxustificada” e acusou a rexedora de protagonizar “un acto verdadeiramente miserable, sen precedentes e impropio de quen pretende liderar unha institución”. Pola súa parte, o edil non adscrito Gonzalo Muíños lamentou que se sinalara a profesionais que “non poden defenderse”, e o socialista Gumersindo Guinarte asegurou que Sanmartín “se equivocou” e que “non lle correspondía opinar” sobre o mérito da persoa homenaxeada.
A rexedora respondeu que a polémica é artificial e forma parte dun intento de “criminalización do BNG”. Aproveitou tamén para defender a necesidade de contar con “espazos institucionais para o republicanismo” e criticou que a concesión da Medalla de Galicia non fose acordada coas forzas políticas municipais.
Finalmente, acusou a Constenla de avalar en redes sociais comentarios ofensivos sobre ela, nos que se lle atribuían cualificativos como “cateta” ou “monicreque en mans dunha Bildu Etarra”. O concelleiro popular negou as acusacións, mais as interaccións foron recollidas pola propia Sanmartín durante a súa intervención plenaria.
