A secretaria xeral do PPdeG, Paula Prado, reprochou a “maneira improvisada” do Goberno local de Santiago para pór en marcha a taxa turística, despois de abrirse a “flexibilizar” o prazo para activala ante as críticas do sector hoteleiro.
Para o número 2 do PPdeG, “non sorprende” que no mes de xullo “aínda non fixese absolutamente nada” cunha taxa turística “concedida desde xaneiro deste ano”.
Nesta liña, a preguntas dos medios este xoves nunha rolda de prensa no Parlamento, Paula Prado sinalou que a Xunta “lle deu esa posibilidade”, pero “ten que ter diálogo co sector hoteleiro” nun momento no que “se achega o momento de máis traballo para a hostalaría e pretenden, de maneira improvisada, pór en marcha unha taxa que levan meses para pór en marcha”.
Así, manifestou que se trata de “unha mostra máis” da “falta de capacidade de xestión” dun goberno que cualificou de “perdedores”. “Ten seis concelleiros de 25 e saíu adiante a Alcaldía para o BNG co único propósito de que non gobernase o PP, a lista máis votada”, apostilou.
Neste contexto, defendeu que circunstancias como a xestión da taxa turística son “consecuencia” dun “pacto de perdedores entre o BNG e o PSOE”.
