Os servizos técnicos do Concello de Santiago xa avalían todas as opcións posibles para tramitar as facturas pendentes carrexadas por gastos do autobús urbano, que ascenden a 3.000.000 euros e cuxo pago quedou en suspenso tras o ‘non’ do PP e a abstención dos edís non adscritos no pleno do pasado xoves. A tenente de alcaldesa, María Rozas, adiantou este luns en rolda de prensa que Raxoi xa traballa en alternativas para sacar adiante estas débedas, xa que “o órgano competetente para a súa aprobación é o pleno” e leste bloqueounas.
“Cando teñamos máis avanzados os informes técnicos, xa trasladaremos que pode suceder coa tramitación”, informou a edila, que tachou como “irresponsable” a postura do PP e de “non entendible” a do non adscritos. Estas facturas responden a alugueres de autobuses realizados para a renovación da frota, unha fórmula que o PP cualificou de “ilegal”. Neste contexto, a alcaldesa, Goretti Sanmartín, xa advertiu o pasado venres en declaracións aos medios que as facturas “hai que pagalas” e abriu a porta a que as empresas afectadas –Tralusa e Autocares Rías Baixas– acudisen a “outras vías” para que se realice ese pago, como a xudicial.
“DEMOSTRACIÓN DE IRRESPONSABILIDADE” DO PP
A tamén portavoz de Compostela Aberta cualificou o voto en contra do PP como “unha demostración de irresponsabilidade”. Para Rozas, esta posición demostra que “todo vale con tal de obstaculizar” e de crear “un problema” ao Goberno local. “Creo que a actitude do Partido Popular demostra –en concreto a actitude do seu portavoz, Borja Verea– que non lles importa Santiago, que o que importa é o seu interese partidario e que á cidade lle vaia mal”, reprendeu a concelleira.
Ademais, ve este voto como “incoherente” en relación á súa postura fronte a “expedientes semellantes” en anteriores ocasións, xa que non é a primeira vez que se somete a votación unha factura deste tipo. “Quere Borja Verea que os veciños de Santiago queden sen transporte público?”, formulou de forma retórica.
POSTURA “NON ENTENDIBLE” DOS NON ADSCRITOS
Por outra banda, Rozas tachou a abstención do non adscritos como “non entendible”, xa que “se dialogou” este expediente –como esixiron no anterior pleno– e votaron a favor doutros de características semellantes no pasado. Mesmo, tal e como expuxo, o concelleiro Gonzalo Muíños “presentou expedientes semellantes ao pleno” cando era o titular de Mobilidade e Obras. “Eu non entendo o seu posicionamento, pero o que lamento é a situación na que estamos”, criticou. Non entanto, puxo distancia entre a postura dos expulsados do PSOE e a adoptada polo PP: “Creo que unha abstención non é igual que un voto en contra”.
