A alcaldesa de Santiago, Goretti Sanmartín, reprochou ao líder do PP local, Borja Verea, “non ter en conta os criterios técnicos e os informes” emitidos pola Xunta de Galicia sobre a senda de Conxo, ante o seu anuncio de retomar o proxecto “na súa integridade” no caso de que el chegase a gobernar a cidade en 2027.
“Levo uns cuantos anos en diferentes cargos e non atopei a unha persoa que tivese unha forma de facer política realmente que fose tan rastrera e tan manipuladora como a de Borja Verea”, acusou a rexedora en declaracións aos medios este venres.
Deste xeito, afeou a Verea que afirme que non faría caso aos informes en caso de ser el o alcalde da capital galega: “Parece que aquí hai persoas que están habituadas a funcionar dunha maneira, pois non sei, se chamar de caciquil ou de que, pero pouco menos que iso”.
Para Sanmartín, a forma adecuada de proceder é pedir desculpas tras asumir que “había unha afectación patrimonial, que quen o testemuña é un informe da propia Xunta de Galicia”. “Agora, pensar que ese informe non o temos en conta e pasamos del é a proba de que case non hai palabras”, continuou.
A alcaldesa considerou que, nos últimos tempos, o líder popular ten “un desprezo por eses informes técnicos” e unha maneira de funcionar “que non é democrática” e “nada respectuosa”. A este respecto, comparouno co exalcalde popular da cidade entre 2011 e 2012: “Podería dicirse que é a reencarnación de Conde Roia. Xa sabemos o que é o Partido Popular e o que significou para o Concello de Santiago”.
PSDEG PIDE RETOMAR O CARRIL BICI DIRECTO
Por outra banda, o Grupo Municipal Socialista de Santiago presentará no pleno do 3 de xuño unha proposición para instar á Xunta a retomar a execución do carril bici directo entre Santiago e Milladoiro. Na súa petición, promoveu que se teña en conta a accesibilidade e a protección do patrimonio cultural e natural da zona de Conxo.
O portavoz socialista, Gumersindo Guinarte, lembrou que a súa formación xa advertira da “desfeita” que faría a senda proxectada en zonas como o Banquete de Conxo e que agora foi descartada por informes de Patrimonio. “Agora, a Xunta o que fai é ter unha rabecha e decide castigar a Santiago e destinar os fondos que estaban previstos para esa senda a outros concellos”, indicou en declaracións aos medios este venres.
Nesta liña, instou ao Executivo autonómico e ao goberno local a “traballar e porse de acordo para recuperar o proxecto de comunicación de carril bici directo entre Milladoiro e Santiago” e, desa forma, “aproveitar eses fondos para establecer unha conexión directa”.
