A alcaldesa de Santiago, Goretti Sanmartín, participou na inauguración da sétima edición do Curso Superior de Especialización en Xestión de Obras de Rehabilitación, na que destacou as políticas neste ámbito que impulsa o seu goberno e a aposta por “compactar a cidade”.
Segundo trasladou o Concello nunha nota de prensa, durante a súa intervención no acto, puxo en valor o labor neste campo do Consorcio, que ela mesma preside e ante a presenza do xerente, José Antonio Domínguez Varela.
“O crecemento urbano e o desenvolvemento de chan non poden ser infinitos; a aposta debe ser un modelo urbano compacto, que nos leva a pór o foco na optimización do que xa está construído, polo que é un momento especialmente importante para o sector da rehabilitación”, defendeu.
Goretti Sanmartín remarcou o labor do Consorcio de Santiago que, “da man dun excelente equipo técnico, promoveu importantes obras para a recuperación de edificios e do espazo público”.
Ademais, explicou que a rehabilitación con criterios de sustentabilidade e de accesibilidade universal axudan a optimizar o emprego dos recursos naturais, mellorar o comportamento climático do parque inmobiliario e das cidades, aumentar o ‘confort’ e a calidade de vida das persoas usuarias e, ao mesmo tempo, preservar o patrimonio arquitectónico e cultural.
